Ég er bréfshaus

Ég er dagsetning, staður

 

 

Ég er formlegt kurteisisávarp.

 

Ég er opnunarsetning. Ég er kynningarsetning. Ég er setning sem rekur erindi, sem rekur erindi, rekur erindi. Ég er sár bón örvæntingarfullrar manneskju. Ég er reiðinnar býsn af hógværð. Ég er lýsing á stórkostlegum afrekum. Ég er ítrekun hógværðar. Ég er upptalning, upptalning, upptalning. 

        Ég er frekari útskýring, nánari útlistun. Ég er ítrekun sárinda, frásögn af eymd. Ég rek fingur í gröft opinna sára. Ég höfða til mennskunnar. Ég höfða til samviskunnar. Ég höfða til sektarkenndar vegna atburða horfinna tíma. Ég fer viljandi með ósannindi.

        Ég er upphaf frásagnar. Ég er útskýring á aðstæðum. Ég er vísun í aðra sögu. Ég er miðja frásagnar. Ég er ris. Ég er uppgjör. Ég er frágangur. Ég er málsháttur sem tekur saman söguþráðinn á einfaldan hátt. Ég er ný túlkun á boðskap sögunnar.  

         Ég er uppástunga um málalyktir. Ég er enn frekari ítrekun sárinda. Ég er bruðlun óljósra hótana. Ég er aumkunarvert sársaukaóp. Ég er örvænting að níu tíundu hlutum og reiði að einum tíunda hluta. Ég er boð um kynferðislega greiða. Ég er lýsing á staðsetningu og tíma. Ég er símanúmer. 

Ég er formleg kurteisiskveðja.

    _________Ég er undirskrift____________

Ég er nafn

 

Úr ljóðabókinni Þjónn, það er Fönix í öskubakkanum mínum (Nýhil, 2007).