Um Eirík Örn Norðdahl
Eiríkur Örn Norðdahl er íslenskur rithöfundur og ljóðskáld. Hann hefur gefið út þrjár skáldsögur, sex og hálfa ljóðabók og ritstýrt tveimur bókum um ljóðlist. Auk þess hefur hann þýtt fjölda bóka. Síðastliðin ár hefur hann unnið úr evrópskum og norður-amerískum framúrstefnuhefðum, við sundurtætingu tungumálsins í myndrænar, hljóðrænar, félagslegar og málfræðilegar einingar sínar – og unnið með bæði myndljóð, hreyfimyndaljóð og hljóðaljóð.
Árið 2006 fékk Eiríkur viðurkenningu í Ljóðstafi Jóns úr Vör, fyrir ljóðið Parabólusetning og árið þar á eftir fékk hann hin erótísku stílverðlaun lestrarfélagsins Krumma, Rauðu fjöðrina , fyrir kafla úr skáldsögunni Eitur fyrir byrjendur. Árið 2008 hlaut Eiríkur íslensku þýðingaverðlaunin fyrir Móðurlausa Brooklyn eftir Jonathan Lethem. Hann var svo aftur tilnefndur til Rauðu fjaðrarinnar árið 2009, fyrir brot úr skáldsögunni Gæska.
Nýjasta bók Eiríks er Gæska, sem kom út hjá Máli og menningu í október, 2009.
Eiríkur er búsettur í Västerås, Oulu og á Ísafirði, þar sem hann vinnur í nýrri skáldsögu.
Frekar má fræðast um bækur Eiríks með því að smella hér .
Efri myndina tók Ave Maria Mõistlik en þá neðri Aino Huovio. Smellið á myndirnar til að fá þær í betri upplausn.