Um
Eiríkur Örn Norðdahl er íslenskur rithöfundur og ljóðskáld. Síðastliðin ár hefur hann unnið úr evrópskum og norður-amerískum framúrstefnuhefðum, við sundurtætingu tungumálsins í myndrænar, hljóðrænar, félagslegar og málfræðilegar einingar sínar. Hann hefur gefið út tvær skáldsögur og fimm og hálfa ljóðabók. Þá hefur hann hlotið verðlaun í Ljóðstafi Jóns úr Vör, fyrir ljóðið Parabólusetning , auk hinna erótísku stílverðlauna lestrarfélagsins Krumma, Rauðu fjöðrina , fyrir kafla úr skáldsögunni Eitur fyrir byrjendur og íslensku þýðingaverðlaunin fyrir Móðurlausa Brooklyn eftir Jonathan Lethem.
Nýjasta bók Eiríks er Ú á fasismann – og fleiri ljóð, sem kom út hjá Máli og menningu í október, 2008.
Eiríkur er búsettur í Helsinki og á Ísafirði, þar sem hann vinnur í þremur bókum. Fyrst má nefna bókina Af steypu , sem hann ritstýrir ásamt Kára Páli Óskarssyni, úr ritröð afbóka Nýhils; þá er það skáldsagan Rasmus Klumpur & pólitíski ofstopinn , sem kemur út hjá Máli og menningu haustið 2009; og loks langljóðið Hnefi, sem enginn veit hvenær kemur út en gerir það sjálfsagt einhvern tíma.
Frekar má fræðast um bækur Eiríks með því að smella hér .
Efri myndina tók Ave Maria Mõistlik en þá neðri Aino Huovio. Smellið á myndirnar til að fá þær í betri upplausn.