Sumarbúðir listhneigðra sósíalista og Ljóðahátíð Nýhils

Ég er búinn að uppfæra upplestrarhluta síðunnar, svo nú er hægt að sjá upplesturinn frá ljóðahátíð Nýhils nú á helginni. Ég las upp nokkur ljóð sem ég hafði ekki lesið áður - þar á meðal Iceland Report on the Observance of Standards and Codes og Djúgasvíli. Já, og Strokleðurjakkaföt keisarans, sem birtist á blogginu á dögunum og kom út í lítilli bók í smáritaseríu SLIS (Sumarbúðir listhneigðra sósíalista), ásamt Handsprengju í hádeginu, eftir mig og Ingólf Gíslason, Algjörri krúttsprengju eftir Viðar Þorsteinsson og þriggja rita frá Hauki Má Helgasyni.

Smellið hér til að sjá upplestrana frá ljóðahátíð.

Sjoppuljóðahátíð

Sex erlend skáld og tólf íslensk lesa í ljóðapartíum á Smíðaverkstæði Þjóðleikhússins og taka þátt í umræðum með Birnu Bjarnadóttur og Ármanni Jakobssyni í Norræna húsinu á Fjórðu alþjóðlegu ljóðahátíð Nýhils. Glæsilegt þýðingarit verður gefið út samhliða hátíðinni, sem fer fram 22.-24. ágúst næstkomandi.

Dagskrá ljóðahátíðar

Líf ljóðabókanna – málþing um útgáfu ljóðabóka og óháða útgáfustarfsemi

Ljóðlistin í Ríki Sjoppunnar – málþing um samtímaljóðlist

———-

Ú á fasismann

Vinna við ljóðabókina Ú á fasismann - og fleiri ljóð gengur vel og er von á bókinni frá Máli og menningu í haust. Í bókinni verða 20 myndljóð á fjörutíu síðum, og henni mun fylgja geisladiskur með hljóðaljóðum, meðal annars úr eldri bókum, sem ekki hafa komið út áður nema í beta-útgáfum á netinu.

Þá styttist í ljóðahátíð Nýhils - þar mun ég lesa á laugardagskvöldinu, en hátíðin hefst með pompi og prakt föstudagskvöldið 22. ágúst. Ég sit svo í panel á laugardeginum. Í þeim hluta sem ég tek þátt í verður leitað svara við þeirri spurningu hvort ljóðlist samtímans sé síður ljóðræn en ljóðlist fortíðar.

SLIS2008 - Sumarbúðir listhneigðra sósíalista - munu gefa út fáein smárit sem verður dreift á ljóðahátíðinni. Af þeim á maður ekki að missa, frekar en sjálfri byltingunni.

Á framtíðardagskránni er svo ljóðahátíðin í Ulvik í Noregi í október og panel-umræður í Turku í nóvember (um vélræn ferli í ljóðlist), og svo er fólk alltaf eitthvað að tala um Manitoba - sem verður væntanlega einhvern tíma að alvöru.

Fjallabaksleiðin hefur verið helguð ljóðlist í bili. Við hjá Norddahl.org teljum okkur skylt að mæla með hinni afbragðsgóðu Fjallabaksleið.

Ljóðahátíð Nýhils

Sex erlend skáld og tólf íslensk lesa í ljóðapartíum á Smíðaverkstæði Þjóðleikhússins og taka þátt í umræðum með Birnu Bjarnadóttur og Ármanni Jakobssyni í Norræna húsinu á Fjórðu alþjóðlegu ljóðahátíð Nýhils. Glæsilegt þýðingarit verður gefið út samhliða hátíðinni, sem fer fram 22.-24. ágúst næstkomandi.

Fjórða alþjóðlega Ljóðahátíð Nýhils verður haldin hátíðleg dagana 22.-24. ágúst í Norræna húsinu og á Smíðaverkstæði Þjóðleikhússins. Dagskrá hátíðarinnar er með eindæmum metnaðarfull, en sex erlend skáld koma sérstaklega til landsins í tilefni hennar. Þau munu lesa upp á ljóðapartíum og taka þátt í pallborðsumræðum með íslenskum kollegum sínum. Read the rest of this entry »

Ljóð á Langa Manga á sunnudaginn

Síðasta frétt er löngu úreld, ég er kominn heim. Næst á dagskrá er SLIS 2008 og ljóðakvöld á Langa Manga á sunnudag, ásamt Bryndísi og Hauki Má og Ingó. Frekari upplýsingar hér.

Öskrum: Lexiconjury

Lexiconjury kvöldið var frábært - fékk að lesa með hinum goðsagnakennda Paul Dutton, var klappaður upp - og daginn eftir var ég látinn semja nýtt ljóð með engum fyrirvara. Myndbönd má sjá hér.

Enn í Toronto - í kvöld er það þjófnaður með Kenny G. og svo alls kyns góðgæti í boði út vikuna.

The Scream

TRAILER

In a world without poetry, a reading series is found. History considered it dead, and who would argue with history? And yet here, a sonic power, where past and future collide, is unleashed. It’s a doorway to another dimension, a dimension called Lexiconjury!

Kennedy and rawlings, lexiconjurors bent on the destruction of all we hold dear, emerge from a rift in time to think the unthinkable. They do not care about weapons or power. They have an appointment with eternity, and do not wish to be late. They have but one mission: to return, to return to The Lex long after the world had abandoned it for good. Read the rest of this entry »

Dögun nýrra byltinga

Ég er árinu eldri og rigningin húðlemur kofaskriflið sem ég bý í eins og frekan hreppsómaga, sem rífur kjaft við almættið. Það hefur alla tíð, frá því ég man eftir mér, verið blíðviðri á afmælisdaginn minn. Þangað til í gær. Alltaf hefur sólin skinið á mig, þar sem ég gekk, nema í gær. Í gær var það eins og í dag. Reglulegt íslenskt skítaveður. Hingað á hjara veraldar dró ég konuna mína með lokkandi orðum um vestfirska veðursæld, skjólið af fjöllunum og hitapolla sem verma mönnum og konum um kinnarnar ofanverðar og neðanverðar. Nú malda ég í móinn, segi tja og tja og jæja, og þetta á nú ekki alveg að vera svona, þetta á meira að vera eftir öðrum lögmálum. Er aldrei svona. Þó ég viti það vel að hér getur allur andskotinn gerst.

Á morgun höldum við áleiðis til Kanada, þar sem ríkir sól og hamingja rétt við landamæri Bandaríkjanna - mér skilst af erlendum heimildamyndum að þar læsi fólk ekki dyrum heimila sinna frekar en hér á Ísafirði. Ég ætla að lesa þar nýtt hljóðaljóð fyrir heimamenn unnið upp úr málleysum Æra-Tobba, á glæsilegri ljóðahátíð sem heitir því gargandi nafni Scream Literary Festival. Hér má fræðast nánar um minn hlut í hafaríinu.

Næst á dagskrá er svo Sumarbúðir listhneigðra sósíalista sem hefjast á Ísafirði, við dögun nýrra byltinga, sem verður vonandi ekki fyrr en ég er kominn aftur. Það væri ægilegt að missa af öllum byltingunum sem eru í vændum.

Brandarablandarar V: Hvort sé rétt að leika guð í þessu máli

Fimmta ljóðið í stafrænum ljóðabálki mínum og Jóns Arnar Loðmfjörð nefnist Hvort sé rétt að leika Guð í þessu máli . Ljóðið er unnið upp úr gúgli á „málvillunni“ „hvort sé“. Ljóðið var tekið sem dæmi um „misbitastæðan“ kveðskap bókarinnar í dómi Kristrúnar Heiðu Hauksdóttur á Kistunni, og sagði: „Þessi höfundargjörð að henda tungumálinu í blandarann og týna svo ljóð upp úr gumsinu sýnir fram á fáránleikann í tjáningunni en verður útreiknanleg þegar líður á síðurnar. Höfundurinn fæst við orð en áherslan á merkinguna týnist í þessum óvæntu tengingum eða í það minnsta er örðugt fyrir lesandann að fóta sig í þessu sporti, leikurinn er kunnuglegur en lesandinn þekkir ekki reglurnar. Það er gott að vera fullur af ljóðum en maður verður ekki fullur af þessum kokteil þó það sé gaman að lesa bókina. Það er kannski ekki yfirlýst markmið ljóðalesturs að það eigi að vera gaman en titill þessa verks gefur það samt til kynna. Eiríkur hendir gaman að ljóðum og tungumálinu um leið. Reyndar klikkir hann út með tilvitnuninni á bókarkápunni: „Ágætis tilraunabókmennt en skortir allt fagurfræðilegt inntak“ og leggur gagnrýnandanum þar með orð í munn.“

Ljóðið má nálgast með því að smella hér.

Löggiltur

„Eiríkur Örn Norðdahl skáld og rithöfundur hefur nú bæst í hóp rithöfunda Máls og menningar og mun í ár gefa út á vegum þess þýðingar sínar á úrvali ljóða bandaríska beat-skáldsins Allens Ginsberg og auk þess frumsamda myndljóðabók og disk með upplestri á eigin ljóðum. Eiríkur Örn (f. 1978) hefur verið helsti forsprakki bókaútgáfu Nýhils frá upphafi og staðið fyrir mörgum uppákomum á vegum hennar. Undir þeim merkjum hefur hann gefið út ljóðabækur sínar en líka unnið fyrir aðrar bókaútgáfur, einkum þýðingar. Þó kom fyrsta skáldsaga hans, Hugsjónadruslan, út hjá Máli og menningu (2004). Helstu bækur hans aðrar eru Heimsendapestir (Nýhil 2002), Nihil obstat (Nýhil 2003), skáldsagan Eitur fyrir byrjendur (Nýhil 2006), Blandarabrandarar (Nýhil 2005), Handsprengja í morgunsárið með Ingólfi Gíslasyni (Nýhil 2007) og Þjónn, það er Fönix í öskubakkanum mínum (Nýhil 2007). Eiríkur Örn hefur skrifað fjölda greina og bókaumsagna í Tímarit Máls og menningar á undanförnum árum. Hann hlaut í ár Íslensku þýðingaverðlaunin fyrir Móðurlausa Brooklyn eftir Jonathan Lethem sem kom út hjá Bjarti í fyrra. Mál og menning fagnar liðsauka Eiríks Arnar og býður hann velkominn.“

Af heimasíðu Forlagsins.

Maður er sem sagt orðinn löggiltur.  Read the rest of this entry »