Að trúa á Evrópu (útumallt hundingjar)
Evrópa er trúarbrögð. Og umræðan um hana er að verða að einhvers konar guðspjalli – spírallast um hártoganir, gífuryrði og uppljómanir. Haukur Már tengir hana við allt sem honum þykir fagurt – frá Megasi til frönsku byltingarinnar til hummus til kommúnisma. Teitur Atlason, sem oft rekur einhvers konar samfélagskrítík á bloggi sínu, rekur orð Katrínar Jakobsdóttur gegn sambandinu (sem eru upptalning á mögulegum göllum sambandsins), og klykkir út með að hún hljóti að vera klikkuð. Sams konar upptalningar eru auðvitað alveg mögulegar á kostum sambandsins – og gerir ekki þá sem þær flytja að klikkhausum, frekar en orð Katrínar falla fyrir jesúsáinnsoginu-rökum Teits.
Orðrétt sagði Teitur að vinstri-grænum væri ekki viðbjargandi. Ég les það sem áfellisdóm yfir geðheilsu Katrínar. Það er kannski oflestur.
Evrópusinnar vilja ekki tvöfaldar kosningar af sömu ástæðum og Evrópuandstæðingar vilja þær: það eru allar líkur á að aðildarumsókn yrði felld, að svo stöddu. Evrópusinnar eru þar í hlutverki sölumannsins sem vill fá viðskiptavininn til að máta peysuna – þó óvíst sé hvort hann vanti peysu – því sá sem mátar er líklegri til að kaupa. Evrópuandstæðingar vilja koma í veg fyrir mátunina, því sá sem ekki mátar er líklegri til að kaupa sér einfaldlega eitthvað annað.
Ekki það maður sanni neitt með myndlíkingum.
Mér er meinilla við kórlíf. Og held að nú sé ekkert mikilvægara en krítísk umræða um ESB. Krítísk afstaða. Að dregnir verði fram gallarnir og þeir grannskoðaðir – en andrúmsloftið leyfir það ekki alveg. Andrúmsloftið býður upp á eitthvað annað – andrúmsloftið segir „þessu fólki er ekki viðbjargandi“ og lætur þar við sitja. Andrúmsloftið segir „við getum ekki beðið“. Andrúmsloftið hristir af sér alla gagnrýni með því að segja efasemdarmenn ýmist huglausa, fáfróða eða hreinlega illa.
Einhverjir ljúga því áreiðanlega að sjálfum sér að þeir vilji fara í aðildarviðræður til þess að fá upplýsingar, til þess að vita hvort þeir vilji vera með eða ekki. En ef einhver þeirra kýs á móti aðild þegar til kastanna kemur – að því gefnu að ekki komi út úr samningnum að við eigum að borða börnin okkar – skal ég hundur heita.
Upplýsingarnar höfum við nú þegar. Við vitum jafn vel hvað Evrópa er og hvað Noregur er eða Bandaríkin. Það vita allir að 2/3 Evrópulöggjafar er líka lög á Íslandi. Og að við höfum ekki áhrif á þá lagasetningu, nema algerlega periferalt. Evrópa er einfaldlega ekkert leyndarmál. Og jújú, það þarf að kjósa um smáatriðin líka – en grundvallarákvörðunina um umsókn er alveg hægt að taka að svo stöddu (nema auðvitað, að hún verður líklega nei – sem er verra fyrir þá sem vilja inn).
Við þurfum bara að tala saman án þess að annað hvert orð sé ásökun um drottinssvik eða fávisku.
Er það kannski ekki satt að dýr séu pyntuð í Frakklandi? Eða að grunnstaða sambandsins sé markaðsbúskapur – með rými undir mannréttindi og svo framvegis? Lýgur Katrín Jakobsdóttir því að sambandið sé vont við verkalýðsfélög? Er þá ekki hægt að hrekja það bara?Eða má einfaldlega ekki segja neitt slæmt um ESB án þess að vera dæmdur óviðræðuhæfur af hinu liðinu?
Evrópusinnar segja galla Evrópusambandsins vera stökum aðildarlöndum að kenna en Evrópuandstæðingar segja sambandið sjálft sekt. Konan mín (sem er sænsk) segir sænska velferðarríkið smám saman að tætast í sundur í nafni evrópskra laga. Vinstri Evrópusinnar svara því með að segja að allir hafi nú fært sig til hægri síðustu áratugina og það sé ekki hægt að kenna ESB um hægrisveiflu í Svíþjóð. Evrópuandstæðingar segja ESB kapítalískt batterí sem ætlað sé að auðvelda fjármagni að færast á milli landa – þannig að Lidl komi í staðinn fyrir Bónus. Þá er Bónus orðið kaupmaðurinn á horninu – bókstaflega. Í Finnlandi leggur vinstrisinnað fólk sig fram um að kaupa af finnskum keðjum frekar en alþjóðlegum. Og hér eru svo sannarlega engir kaupmenn-á-hornum lengur. Og ég veit að við hötum öll Jón Ásgeir – og Bónus hljómar eins og monster. En Bónus er samt ekki Lidl.
Þessu svara Evrópusinnar með því að segja að Ísland hafi verið fullfært um að gerast kapítalískara en Evrópa á síðustu árum – kaþólskara en páfinn – og svo skal böl enda bæta með að benda á eitthvað annað.
Myndu Evrópusinnar áfram vera Evrópusinnar ef Evrópa væri Ameríka? Mörg þeirra tilfinningaraka sem borin hafa verið á borð (og ég tel fullgild) eiga líka við um Ameríku, og jafnvel enn betur. Stjórnarskráin þeirra er ekki síður fín en sú franska, og byltingin þeirra er æði. Þeir hafa verið leiðandi í mannréttindabaráttu og listum á 20. öldinni. Þeir hafa meira að segja verið leiðandi í and-ameríkanisma – sem er bandarísk útflutningsvara í boði Bobs Dylan og félaga.
Eða er þetta bara spurning um baguette-átrúnað? Að forðast hamborgarasatan? Það er ekki mikill munur á næringargildinu, en ég hallast þó að því að góður hamborgari sé heilsunni hollari en franska hvítabrauðið.
Ég hef afskaplega litla trú á því að Evrópusambandið muni breyta íslensku lífið mikið. Það hjarir allt. Með eða án. Evrópuumræðan mun ekki hverfa – frekar en hún hefur gert hér í Finnlandi. Og hún mun að öllum líkindum hljóma svipað, vera sveipuð sömu dulúð – og jú, lýðræðishallinn Evrópusambandsins er staðreynd, og sá sem er ekki tilbúinn til að taka hann til greina er líklega ekki viðræðuhæfur fyrir átrúnaði. Þegar ég heyri minnst á Evrópusambandið í kringum mig – og þá af Svíum, Finnum og Frökkum, en slík er skipting vinahópsins – er það oftast til að kvabba (eins og gengur og gerist um stjórnvöld í munnum hinna krítísku). Og kvabbið snýst yfirleitt um a) hvernig sambandinu fylgdi keðjuvæðing verslana, kaffihúsa o.s.frv. og b) hvernig stjórnmálamenn beita því fyrir sig – hvernig þeir fara til Brussel, samþykkja einhvern fjárann sem enginn veit hvernig var samþykktur, koma síðan með lögin heim og þykjast ekkert vita eða geta gert. Svona er þetta bara, og við verðum bara að lifa við það. (Af einhverjum ástæðum fer mun minna fyrir þessu heima, hvað sem líður 2/3 löggjafarinnar – annað hvort erum við þá sinnulausari, við röflum minna, eða þessi 1/3 sem eftir er skiptir einhverjum sköpum).
Engu skiptir hvort Ísland er með eða ekki. Þessu þarf að breyta. Vegna þess að ekki er við það búandi. Og það búa fleiri í heiminum en Íslendingar.
Afstaða mín til Evrópusambandsins litast minna af mögulegu atkvæði mínu í íslenskum kosningum, og meira af því að ég geri heldur ráð fyrir því að eyða meirihluta þess sem eftir er ævinnar – tæpum meirihluta, en meirihluta samt – í Evrópusambandinu. Og það án þess að Ísland verði með. Ég er einfaldlega giftur Svía og að fara að eignast barn í Stokkhólmi. Min framtid är Europeisk, hur som helst.
Afstaða mín er líka heldur neikvæð. Ég tel það betra veganesti. Ég get ekki ímyndað mér neitt pínsamara en að fara inn í ESB við hinn alíslenska, trúarlega lúðraþyt – þann sama gagnrýnishatandi skátasöng og glumdi um allt útrásarárin blessuðu, með öðrum formerkjum. Ekki að það sé betra að sitja fyrir utan með haldið fyrir eyrun og fýlugrettu – en það er líka ekki neikvæð afstaða heldur þögul og fúl.
—
Ég vil auk þess biðja Evrópusinna um að gera sér grein fyrir því að Jóhanna Sigurðardóttir er ekki í þeirri stórkostlegu samningaaðstöðu sem spunnin hefur verið í fjölmiðlum, bloggum og fésbókum. OSB-stjórn eru hreinir draumórar – heldur einhver í raun og veru að Birgitta Jónsdóttir, sem er frægust af því að hlekkja sig við stórvinnuvélar, sé á leiðinni í ríkisstjórn með Framsóknarflokknum? Heldur einhver að henni sé ESB mikilvægara en hálendið – til dæmis? Og heldur einhver að Framsókn færi í Evrópustjórn án þess að fá sína hektara í þingfararkaup? Birgitta er ekki verseraður stjórnmálamaður með sigg á sálinni – hún er nýstigin á þing og ég vona, okkar allra vegna, að hún haldi hugsjónum sínum en selji þær ekki. Alveg burtséð frá því hvað mér finnst um ESB.
Og því verður vart lýst með orðum hvað mér finnst það ólíklegt að af OSB-stjórn verði.
Fari Samfylkingin aftur í stjórn með Sjálfstæðisflokki verður þeim einfaldlega aldrei treyst aftur.
Samfylkingin þarf því að ná samkomulagi við VG. Það er einfaldlega ekkert flóknara. Hin evrópska niðurstaða kosninganna er ekki kraftmeiri en svo – hvernig svo sem Mörður reiknar saman stuðning við aðild. Þessir tveir samstarfsflokkar um Evrópuaðild eru einfaldlega ekki samræmanlegir, hversu sem Samfylkingin myndi reyna að miðla málum – og hvorugur nógu heitur um aðild til að selja sig fyrir hana.
Og önnur mynstur eru einfaldlega ekki í myndinni.
Væri ég Evrópusinni myndi ég því gleðjast mjög að Jóhanna sé bjartsýn á góða niðurstöðu eftir fund með Steingrími. Það er einfaldlega diplómatískur stórsigur – og það hvort sem kosið verður á Alþingi um aðildarumsókn eða farið í þjóðaratkvæði (ég hef enga trú á að VG samþykki tafarlausa umsókn).
En í millitíðinni skulum við reyna að tala um Evrópu eins og hún sé ekki Mekka, án þess að gelta eða vísa hvort öðru á bug með gífuryrðum einsog elítu (sem er auk þess bjöguð og mannskemmandi orðanotkun) eða fáráðlingur, þverhaus o.s.frv. – annars skiptir engu hvort niðurstaðan er já eða nei, hún verður ógeð fyrir sakir þess hvernig að henni var komist.
Og nú er líklega ekki seinna vænna fyrir spunakarla og þrýstihópa að byrja að róa. Það verður kosið – annað hvort þarf að ýta á alþingismenn eða kjósendur. Sumir munu róa fram og hinir aftur. Og allir munu saka hina um að eyðileggja allt fyrir öllum. Tala sig úr ríkisstjórn. Vera með þvergirðingshátt. Reka flein í stjórnarsamstarfið.
Geri ég ráð fyrir.
Greinin hans Hauks Más var ágæt svo langt sem hún náði en mér fannst hún ekkert sérlega sannfærandi. Hún sagði eiginlega: fyrst Ísland er svona mikið drasl hvort eð er þá töpum við engu á að ganga í ESB. Nema kannski kvabbinu í kringum það, sem væri alveg markmið í sjálfu sér (ég er orðinn dáldið þreyttur á þessu) nema, einsog þú segir, þá er það ekki einu sinni neitt sérlega líklegt.
Ég trúi og treysti á að við munum sjá vinstristjórn leiða þetta til likta á friðsaman hátt.
Þetta er nákvæmlega sama mantran og í Jóni Val Jenssyni.
Það að fara ekki í aðildarviðræður er eins og að henda lottómiða án þess að kíkja á tölurnar. Enn og aftur ætla ég að reyna höfða til raunveruleikans í þessu máli. Ég tók 18 miljón króna húsnæðislán til 40 ára. Ég þarf að greiða það 17 falt til baka þ.e. 300 miljónir þegar upp er staðið eftir 40 ár. Hvergi í heminum er fólki boðið upp á slíkt rán. Ef við færum í ESB er talið að bara vextirnir myndu lækka á heimilin og fyrirtækin í landinu um 228 miljarða á ári, já 228 þúsund miljónir á ári. Þetta þýðir á mannamáli að við þurfum að leggja mun meiri vinnu á okkur til að standa í skilum með ala þessa auka vexti. VG talaði um að við ættum að afnema verðtryggingu. Ok, en það verður ekki gert nema með öðrum gjaldmiðli en krónunni, því ástæðan fyrir verðtryggingunni er sú að við erum með handónýta krónu sem enginn vill lána nema vera bæði með okur vexti og verðtryggingu til að vera viss um að tapa ekki á því. Þeir sem eru á móti ESB, eru það vegna þess að andstaðan eru trúarbrögð, og reyndar röklaus í þokkabót. koma með eitthvert hálfvitalegt kjaftæði um að við myndum missa allar auðlindir okkar. Heldur einhver heilvita maður að allar þær þjóðir sem hafa gengið í ESB á undan okkur hafi byrjað á því að afsala sér öllum sínum auðlindum, hvurslags bull er þetta og hræðsluáróðu. Eina ástæðan fyrir því að ég vill fara í ESB, er sú að ég held að lífsgæði muni batna til mikilla muna.
Greinin byrjar á að Evrópa sé trúarbrögð. Síðan fjallar hún bara um hvað höfundur greinarinnar trúir á.
Annars er hún í takt við anti-EU fasistana í bloggheimum. Hún er þónokkuð betur skrifuð samt en steypan sem vellur úr fyrr nefndum anti-EUistum.
Sóun á tíma að lesa, það eru þónokkrir moggabloggarar sem eiga sér ekkert líf og skila svona greinum annann hvern dag.
Ef þetta eru trúarbrögð, þá er ég í fyrsta skipti í lífinu stoltur að hafa trúarbrögð. Ég trúi á Evrópusambandið.
http://en.netlog.com/go/explore/videos/videoid=en-2355064
Geturðu ekki komið heim og haldið nokkrar ræður yfir þingmönnunum?
Ég held þetta sé hárrétt greining hjá þér. bara of myndrýk og margorð
Alltof margir boða þetta evróputrúboð með bundið fyrir bæði augu.
Umræðan er ekki nógu þroskuð.
Og hvað á það að þýða að boða aðildarumsókn án þess að tíunda okkar kröfur? Ég mun aldrei veita Samfylkingartrúboðunum óskorað umboð til að semja við ESB. Þeir mundu selja ömmu sína fyrir dúsu. Við eigum nefnilega ekki að stilla málum upp með því að spurja hvað við græðum, heldur hverju við fórnum.
Þetta er nú líka stundum á hinn veginn. Ef maður segist vera hlynntur því að fara í aðildaviðræður, þá gera þeir sem eru á móti ESB manni upp þá skoðun að Evrópusambandið leysi allan vanda og þar drjúpi smjör af hverju strái. Maður getur alveg verið hlynntur aðildaviðræðum án þess að tapa allri gagnrýnni hugsun.
Hræðsluáróðurinn hefur verið himinnhrópandi og ótrúlega miklu logið uppá Evrópu. – Ekki hefur vantað það.
Afhverju má þjóðin ekki kjósa, andskotinn!! Hvar er litla, elskulega krúttlega lýðræðið?
Leið rökleysingjans er að niðurlægja skoðanir annarra. Ég gat ekki lesið í grein Hauks að hann niðurlægði skoðanir ESB-andstæðinga en þú niðurlægir skoðanir hans, kallar þær „trúarbrögð“ og þá sem hafa þær „hundingja“. Svei-attan
Eiríkur þú veist væntanlega að við höfum í dag engin áhrif á þessi 2/3 laga ESB sem við tökum við í pósti og peistum beint inn í Alþingistíðindi.
- Við sitjum ekki við borðið og getum hvorki sagt já eða nei eð kannski, við bara tökum við pakkanum í áskrift frá ESB.
ESB-sinnar vilja að við séum þátttakendur við borðið svo hægt verði að röfla í ráðherrum okkar yfir því hvað þeir komi með heim eftir að hafa setið í Brussel og teksi á við ráðherra hinna þjóðanna.
Gott fólk.
Í fyrsta lagi er ég ekki evrópuandstæðingur. Ég er efins um margt í evrópusambandinu – en mér finnst alveg jafn vitleysislegt að tala um landráð og elítuhugsjónir og allt hitt.
Hundingjarnir eru nefnilega útumallt, en ekki á einum stað. Ég er sammála nær öllu í grein Hauks – mér finnst hún falleg og góð – en hún sannfærir mig samt ekki, ég kemst ekki að sömu niðurstöðu og hann. Ég held að hún byggi á trúarbrögðum, og ég held að afstaða mín geri það líka – sem og flest viðbrögð við sambandinu hingað til. Við höfum komið okkur upp stöðum og verjum þær. Og það gerið þið, gott fólk, einnig.
Svo svörum við þessu bara í réttri röð.
Egill: Reductio ad hitlerum? Áttu ekki að vera yfir þetta hafinn?
Valsol: Ég hef hvergi sagt að við eigum ekki að fara í aðildarviðræður. Og svo sannarlega hef ég hvergi rekið áróður um að við munum missa allar okkar auðlindir. En mér finnst ekki út í hött, miðað við hvað kom upp úr kjörkössunum, að það verði kosið um það hvort það eigi að fara í aðildarviðræður.
Uni: Ég er gagnrýninn á Evrópusambandið, meðal annars vegna þess að ég bý þar. Ég er hins vegar ekki endilega mótfallinn því að Ísland gangi í Evrópusambandið. Ég er svona 60/40 með og móti, meira á móti, að vísu – en það rokkar til. En mér finnst hin krítíska afstaða ekki geta beðið. Mér finnst ekki að við eigum að geyma hana þar til við erum komin inn.
Einar: Gott hjá þér.
Valur1: Lít á þetta síðar.
María: Ætli þingmenn þurfi ekki fyrst og síðast frið næstu daga, frekar en ágang?
Jóhannes: Það eru líka alltof margir sem gagnrýna sambandið með bundið fyrir bæði – og umræðan er svo sannarlega ekki þroskaðri hjá Jóni Vali en Eiríki Bergmann. Hjá Atla Gíslasyni en Róberti Marshall.
Helgi: Já. Sammála. En þeir sem láta annars vegar eins og við megum engan tíma missa annars farist himinn og jörð, og hins vegar eins og portúgalskir sjómenn muni ryksuga þorskinn úr hafinu á 10 mínútum – eiga ansi stóran skerf af umræðunni. Og þar með taldir eru þingmenn og aðrir bokkar.
Gunnar: Já. Það er rétt. En það hefur heldur ekki vantað á gyllinguna hinumegin.
Spartacus: Ég vil að hún kjósi.
Gunnar: Haukur Már er besti vinur minn. Hann var svaramaðurinn minn þegar ég gifti mig. Hafi ég niðurlægt hann og skoðanir hans var það ekki viljandi, og sannarlega ekki gert vegna þess að ég beri ekki virðingu fyrir þeim. Haukur Már er einn allra gáfaðasti maður sem ég þekki, innræti hans er himinfagurt og ég veit ekki um marga hvers grundvallarafstaða til lífsins svipar jafn mikið til minnar eigin.
Gunnar (aftur sami?): Já, ég veit – það stendur meira að segja í greininni. Þetta eru rök fyrir að ganga í ESB. Eða ganga úr EES – sem er kannski ekki lífvænlegt. Mér finnst það sjálfum óþolandi nauðhyggja að við getum ekki bara gert það sem okkur sýnist – og óþolandi að maður eigi að hljóma hálfgeggjaður fyrir að vilja velta því fyrir sér. En það eru auðvitað ekki rök í málinu að við búum nú þegar við 2/3 laganna – ekki beinlínis – því ef við værum með bein í nefinu og kærðum okkur um það, myndum við einfaldlega losa okkur undan þessum 2/3. Því það er auðvitað óþolandi þrælsháttur að búa við óbreytt ástand – með fótinn í dyrunum en hvorki inni né úti.
—
Eru engir evrópuandstæðingar þarna úti, sem vilja berja á mér fyrir að segja Evrópuandstæðinga ekki vilja máta fötin áður en þeir kaupa þau?
Ég er orðinn svo leiður á því að okkur sem gerum okkur grein fyrir því að framtíð okkar sé hvergi annarsstaðar en í ESB sé gert upp þær hugmyndir að ESB sé einhver Mekka eða lausn allra vandamála. ESB er sá grundvöllur sem við þurfum til að geta byggt upp hér aftur. Það er ekkert meira og ekkert minna en það. Án ESB og stöðugrar mynntar höfum við ekki þann grundvöll. Það er þó alveg ljóst að ESB og Evra MUN bjarga okkur frá verðtryggingu og okurvöxtum, og fátt skiptir heimilin meira máli en það.
Íslendingur sem tekur 30.000.000 kr. í verðtryggt fasteignalán í krónum greiðir á 40 árum 158 milljónir vegna lánsins (m.v.5% verðbólgu og 5% vexti). Sama lán værum við í ESB og með Evru, hefði þýtt heildarendurgreiðsla upp á 60 milljónir (líka reiknað með 5% vöxtum, sem þykja heldur háir Evruvextir). Hér er því um að ræða krónuskatt fyrir að vera íslendingur og búa á Íslandi upp á 98 milljónir.
Ég bara SKIL EKKI hvernig það má vera að hluti almennings kjósi að ganga ekki í ESB þegar þessar tölur æpa á mann.
Að sjá ekki framtíð annars staðar en í ESB er að upplifa sambandið sem umfangsmeiri lausn en ég hef trú á að sé raunin. Flest lönd heimsins eru þrátt fyrir allt ekki í ESB. Og íslenskum lögum um vexti og annað er hægt að breyta án ESB. Gjaldmiðillinn er svo annað mál – og hvort okkur sé betur borgið, það má vel vera, og mér finnst það sem þú telur upp ekki verri rök en hver önnur. En þau lýsa engri nauðsyn.
Frábær pistill.
Bara að benda þér á að þó flest lönd heimsins séu ekki í ESB eru meira en 80% allar Evrópuþjóða í ESB aðrir hafa ekki rétt á því. Vegna smæðar hagkerfis okkar verður sjálfstæð mynt alltaf hávaxta mynt. Það er einmitt það sem er að. VIð erum ekki lengur frumframleiðslu land. Við erum er reyna að hasla okkur völd á hátækni og þekkingariðnaði. Og til að þessar greinar geti dafna er okkur lífsnauðsyn að komast í stærra hagkerfi þar sem að sveiflur eru litlar og við samkeppnishæf. Annars fara þessi fyrirtæki bara úr landi.
Það má vera rétt að Evrópa sé trúarbrögð.
Það má líka segja að vera flokksbundinn í pólitískri hreyfingu séu trúarbrögð líka. Það þarf ekki nema að horfa á fréttaþætti frá landsfundum flokkana. Það er eins og ad horfa á samkundu hjá sértrúarsöfnuði. Það vaeri nær að segja að pólitík eru trúarbrögð.
Ég skil ekki hvað er að ykkur sértrúarmönnum með eða gegn ESB. Göngum til samninga og leyfum fólkinu að kjósa um þetta. Er það ekki lýðræði?
Hættið þessum áróðri þangað til kemur í ljós hvað fólkið vill.
Við þurfum ekki neina til þess að hafa vit fyrir okkur. Við getum alveg hugsað fyrir okkur sjálf. Enda hefur það sýnt sig að það virðist öllum fyrir bestu.
Hvað með að leyfa þjóðinni að kjósa hvort hún vill sækja um aðild að ESB? Þá fáum við að sjá hvað fólkið vill.
Takk fyrir góð svör Eiríkur.
Það er magnað að enn sé fullyrt að evran losi okkur við verðtryggingu. Sem er ekki satt.
En hér er ein fullyrðing sem ég hef ekki heyrt áður og mig langar að kanna betur. “Vegna smæðar hagkerfis okkar verður sjálfstæð mynt alltaf hávaxta mynt” Ætli þetta sé satt eða standist rök ? ég leifi mér að efast.
Verðtrygging er mesta svikamilla sem til er og allir trúa að hún sé föst við krónuna.
Verðtryggingu þarf einfaldlega að afnema. Það þarf ekki evru til þess.
Mér þætti vænt um að fólk gerði sér grein fyrir því sem það er að segja, en svona er lífið…svo er það annað sem er ekki satt og það er það að verðbólga sé krónunni að kenna. Það er algjör della, því að sömu lögmál eiga við stóra og litla mint. Verðbólga verður til að mestu leiti vegna óvandaðra útlána. Of mikið af peningum í umferð veldur þenslu og verðbólgu. Vextir eru svo afleiðing af þessu og ákvörðun seðlabanka um væntingar á markaði. Vegna of mikilla útlána en ekki vegna krónunnar.
Vextir eru því ekki háðir mintinni og peningar í umferð eru oftast hlutfall af stærð hagkerfis hvort eð er.. En það eru sveiflur og þær má jafna með til dæmis gengissveiflujöfnunarsjóð.
ýktar sveiflur undanfarinna ára eru vart marktækar vegna gríðarlegra umsvifa bankana og fortíðin vart notuð til að draga áliktanir um ágæti krónunnar eða lesti. Hagstjórn og verðtrygging hefur komið því til leiðar.
Þetta er nú mitt innlegg í rökræðurnar.
Það kannski gagnast einhverjum aðvita minn skilning á orðinu elíta. Kannski ekki.
Ég skil það þannig að einhver viss hópur er mataður í kringum sérhagsmuni á sjónarmiðum hagsmunanna. Elítan er afurð ójöfnuðar og engra fjölmiðlalaga til dæmis. Elítan er fínt orð sem er eiginlega lýsingarorð yfir þröngsýni á vissa yfirsýn.Földu eignarhaldi fjölmiðla og mentastofnunum sem vanþroskast vegna fjármamagns og viðhalda einhverju vissu sjónarhorni. Mitt orðgildi.
Þetta er fínn pistill. Laus við tilfinningaflækjur og upphrópannir. Við þurfum að fá fleiri innlegg með og á móti frá fólki sem býr og starfar á Evrusvæðinu til að hrinda af stað dýpri umræðu.
Eins og ég var að segja við þig einhversstaðar, Tóti, þá þykjast margir sjá þær blikur á lofti að Evrópusambandið sé að liðast í sundur. Margir segja þetta og víða. Hvort eitthvað sé hæft í því skal ósagt látið – enda væri heldur ekki alslæmur kostur að ganga í Bítlana þótt árið væri 1968,5. Í það minnsta breytist það, Spánverjar munu að líkindum td sjá fram á að fá ekki sömu styrki og þeir hafa fengið áður til að byggja upp lamað heilbrigðiskerfi etc. Krananum verður snúið við og Spánverjar þurfa að borga, og hví skyldu t.d. Katalónar vilja borga fyrir eitthvað sem önnur héruð nutu í meira mæli? Lýsa þeir þá ekki bara yfir langþráðu sjálfstæði? Er þá ekki grundvöllur fyrir fleiri efnahagsbandalög í Evrópu? Eða eftir öðrum kríteríum, s.s. lönd við Atlantshafið. Hvar liggja eiginlega mörk Evrópu og eru þau ekki að riðlast?
Mergurinn málsins er samt sá að það er GOTT að hafa flokka sem eru ósammála um þetta saman í stjórn, og gott þegar kemur að viðræðum. Það eina sem er alger nauðsyn er að þagga niður í þeim nauðhyggjuröddum, utan flokka og innan, sem segja að tveir flokkar geti ekki starfað saman án alsættis um ESB. Vika í stjórnarmyndunarviðræður? Og hvað svo, SDB?
Svo endurtek ég ósk mína um að einhver stofni sannleikurinnersáaðégveitíraunekkialvegghvortégersammálaeðaekki.is
Helstu fræðimenn á þingi út í heimi hafa ekki hugmyng um hvað þessar reglur EU snúast um,samt er búið að reyna að finna út úr því undanfarinn ár enn þeir komast ekkert áleiðis með þetta ennþá í dag.Tilgangurinn er að setja lög yfir fólk sem hefur þá ekki lengur frelsi til að verja sig svo alvarlegt er það nú bara.Skoðið söguna og hvað er að gerast út í heimi í dag.Það eru milljónir eftirlitsmyndavéla í stórbæum í Englandi.Jafnvel fiðhelgin er ekki virt og þetta er bara brot af þessu öllu saman.Vaknið þið.
http://www.youtube.com/watch?v=Mnq5U9ovtaE&NR=1
Ekki líta á þetta sem rógburð Hillary Clinton er utanríkisráðherra í dag.Það er ekkert gott við þá sem strjórna þeim sem eru við stjórn í hvítahúsinu og pentagon.
http://www.youtube.com/watch?v=Pexj-Ov77NM&feature=related
Ég datt í netleti og dugnað Hermann.
Kemur ekki að sök þar sem ég er sammála þér í öllum aðalatriðum.
Hér er enn eitt zeitgeist myndbandið sem sýnir að mínu mati ótvírætt að 11/9 var insite job.Mjög fræðandi myndband einnig.Mæli sterklega með því.
http://video.google.com/videoplay?docid=-7810993921354002750